பசங்கள் அதிகம் படிப்பதில்லை!

Translated from this article: https://www.theatlantic.com/education/archive/2018/09/why-girls-are-better-reading-boys/571429/

அமெரிக்கா போன்ற வளர்ந்த மேம்பட்ட நாடுகள் சென்ற நூற்றாண்டில் கல்வித் துறையில் ஒரு உன்னதமான மாற்றத்தைக் கண்டிருக்கின்றன : ஒரு காலத்தில் பள்ளிகளிலிருந்தும் கல்லூரிகளிலிருந்தும் புறக்கணிக்கப்பட்ட, ஓரங்கட்டப்பட்ட சிறுமிகளும் பெண்களும் இன்று அந்த நிறுவனங்களில் பெருமளவில் இடம் பிடித்து விட்டார்கள். 1970களில், மொத்த மாணவர் தொகையில் 40 விழுக்காடே இருந்த பெண்கள் இன்று 56 விழுக்காட்டில் பெரும்பான்மை பெற்று முன் நிற்கிறார்கள்.

இந்த முன்னேற்றத்திற்கு பல காரணங்கள் இருந்தாலும், அதிகம் முன் வைக்கப்படாத ஒரு காரணம் உண்டு: சிறுவர்களை விட சிறுமிகள் அதித அளவில் புத்தகம் படிக்கிறார்கள் என்பது தான் அது. இங்கிலாந்திலுள்ள ஸ்காட்லாந்தின் டண்டீ பல்கலைக்கழகத்தின் கல்வி/சமூகத்துறை பேராசிரியர் கீத் டாப்பிங் குழந்தைகளின் படிக்கும் பழக்கம் பற்றி நடத்திய ஆய்வு முடிவில் மூன்று காரணிகளை முன்வைக்கிறார்.

  1. சிறுமிகளோடு ஒப்பிட்டு நோக்கும் போது சிறுவர்கள் வார்த்தைகளைப் புரிந்துகொள்ளும் முயற்சியில் குறைவாகவே ஆர்வம் காட்டுகிறார்கள்.
  2. நடுநடுவே பத்திகளை விட்டுப் படிக்கிறார்கள் அல்லது முழுப் பகுதிகளையே படிக்காமல் விடுகிறார்கள்.
  3. பெரும்பாலும் தங்கள் வாசிப்பு திறனுக்கும் கீழே உள்ள புத்தகங்களையே தேர்ந்தெடுக்கிறார்கள் .

அவர் அடுத்து சொல்கிறார் சிறுமிகள் எல்லாவற்றையும் முழுமனதுடன் செய்ய தலைப்படுகிறார்கள். சிறுவர்களோ சில அல்லது பெரும்பாலான பள்ளிப் பாடங்களை அரைமனதுடனே அணுகுகிறார்கள்.” இன்னும் இது போல நடத்தப்பட்ட பலப்பல ஆய்வுகள் மூலம் சிறுமிகள தம் மன மகிழ்ச்சிக்காகவே வாசிக்கிறார்கள் என்று புலப்படுகிறது.

ஆனால் இது பிரிட்டனில் மட்டுமுள்ள நிலையல்ல. வாசிப்பு ஆர்வத்தில் பெண்களின் முதனிலை எல்லா வளர்ந்த நாடுகளிலும் காணக் கிடைக்கிறது. 2009ம் ஆண்டில் உலக அளவில் 65 நாடுகளில் 15 வயதுடையோரின் கல்வித் திறன் பற்றி ஓர் ஆய்வநடத்தப்பட்டது. இதில் 64 நாடுகளில் சிறுவர்களை விட அதிக எண்ணிக்கையிலான சிறுமிகள் தம் உள்ளின்பத்திற்காக வாசிப்பதாக கூறினர். சராசரியாக இந்த நாடுகளில் ஆய்வில் பங்கெடுத்துக்கொண்டவரில் பாதி சிறுவர்களே இன்பத்திற்காக படிப்பதாக சொன்னார்கள். சிறுமிகளிலோ நான்கில் மூன்று பேர் இப்படி படிப்பதாக கூறினர். (இந்த புள்ளிவிவரம் வளர்ந்து வரும்/ ஏழை நாடுகளில் ஒத்து வராது ஏனெனில் இங்கே பெண்களின் படிப்பறிவு சூழல் ஆண்களுக்கு இருப்பதை விட குறைவாகவே உள்ளது.)

லகமெங்கும் இப்படி பெண்கள் ஆண்களை விட அதிகம் படிப்பதின் ரகசியம் ஆண் பெண் உடல்கூறு வேறுபாட்டால் அல்ல. “மூளைத்திறன் இருபாலார்க்கும் ஒன்று தான். வேறுபாடுகள் நிகழ்வது சமூக கட்டுப்பாடுகளினால் மட்டும மரபணுக்களால் அல்ல. பொதுவாக சிறுவர்கள் தமது சகாக்களின் மதிப்பை பெற வேண்டுமென்ற அழுத்தத்தல் அதிகம் பாதிப்படைகிறார்கள். அங்கே படிப்பது என்பது எள்ளி நகையாடப்படுகிறது” என்கிறார் சிகாகோ மருத்துவ கல்லூரியின் நரம்பியல் நிபுணர் லிசே எலியட்.

ஸ்திரேலியாவிலுள்ள கிரிபித் பல்கலைக்கழகத்தில் பணியாற்றும் உளவியல் நிபுணர் டேவிட் ரெய்லி சமீபத்தில் பங்கேற்ற வாசிப்பில் பாலின வேறுபாடுகள்பற்றிய ஆய்வில் மேற்கூறிய வாதங்களையே வந்தடைகிறார். அதனோடு கூட, விரும்பி, புரிந்து வாசிப்பது என்பது பெண்ணின் இயல்பு என்றும் சுட்டிக்காட்டுகின்றார். சிறுமிகள் சிறுவர்களை விட முன்னதாகவே மன முதிர்ச்சி அடைவதும் கூட இந்த வேறுபாட்டிற்கு காரணமாய் இருக்கலாம் என்கிறார். ஏன் சிறுவர்கள் வாசிக்கும் பழக்கம் ஏற்படுத்திக்கொள்வதை ஒரு போராட்டமாக பார்க்கிறார்கள் என்பதையும் விளக்குகிறார். “அவர்களது ஆர்வத்தை ரசனையை தூண்டும் சரியான இலக்கியத்தை கொடுங்கள். மிக விரைவில் அவர்கள் வாசிப்பில் மாற்றத்தை காண்பீர்கள் என்கிறார். நகைச்சுவை புத்தகங்களை உதாரணமாக சொல்கிறார்.

பள்ளிக்கூடங்கள் சிறுவரை கவர்ந்திழுக்கும் படியான யதார்த்தமான நகைச்சுவையான புத்தகங்களை நூலகங்களில் நிரப்ப வேண்டும். பல வேறு வகையான படைப்புகளை பல வேறு நோக்கங்களுக்காக வாசிக்கும் திறன் வெளியுலக வாழ்விற்கு இன்றியமையாத ஒன்றுஅறிவுறுத்துகிறார் கீத் டாப்பிங்.

மகளிருக்கு மட்டும் வாசிப்பதில் இவ்வளவு ஆர்வம் ஏன் என்ற இந்த புரிதல், லகெங்கும் விடாப்பிடியாக இருந்து வரும் பாலியல் ரீதியான கல்வித்துறை ஏற்ற தாழ்வுகளை ஆண் கல்வியின் பின்னோக்குத்தன்மையைஒழிக்க ஒரு வேளை உதவலாம்.

கட்டாயத்திற்காக அன்றி மகிழ்ச்சிக்காக படிக்கும் பழக்கம் வகுப்பறையிலும் நல்ல பலன் தரும். ரெய்லி சொல்கிறார் எந்த ஒரு திறமையையும் பயிற்சியால் மேம்படுத்தலாம். தன்னார்வம் கொண்டு பாட புத்தகங்களொடு மற்றவற்றையும் வாசிக்கும் சிறார்களுக்கு ஆயிரக்கணக்கான வாசிப்பு மணித்துளிகள் மேம்பட்ட வாழ்விற்கு வழிகாட்ட காத்திருக்கின்றன.”

ிறைய படியுங்கள், புதிய பார்வை பெறுவீர்கள்.

Advertisements

18வது அட்சக்கோடு

வெகு சில கதைகள் படித்து முடித்த பின்னும் மனதை பிசைந்து கொண்டே இருக்கும். அசோகமித்திரனின் இந்த கதையும் அப்படித் தான்.

உலுக்கி எடுக்கும் சரித்திர நிகழ்வுகள் பற்றி படிக்கும்போது பெரும்பாலும் அது நிகழ காரணமாயிருந்த தலைவரைப் பற்றியோ, அமைப்புகளைப் பற்றியோ தான் நாம் அறிய முடிகிறது. சாதாரண மக்களின் வாழ்க்கை அதில் எவ்வாறு இழுத்துச் செல்லப் படுகிறது என்பது தெரிவதில்லை. பாபர் படையெடுப்பில் கிராமங்கள் எவ்வாறு பாதிக்கப்பட்டன, அவற்றின் வயல்வெளிகள் எப்படி அழிக்கப்பட்டன, அது எத்தனை பேரை எவ்வளவு நாள் பட்டினி கிடக்கச் செய்தது போன்ற தகவல்கள் நமக்கு கிடைக்காது.

18வது அட்சக்கோடு ஐதராபாத் இந்தியாவுடன் இணைய மறுத்த கால கட்டத்தில் நிகழும் ஒரு கதை. ஒரு சாதாரண இளைஞனின் கண்ணோட்டத்தில் நகர்ந்து செல்கிறது. இந்து முஸ்லிம் உறவுகள் எப்படி ஒரு சிறு துளி காலத்தில் முற்றிலுமாக மாறுகின்றன/ மாற்றப்படுகின்றன என்று துல்லியமாக படம் பிடித்து காட்டுகின்றது.

இன்னொரு அதிசயமான ஒரு உண்மையும் நிரூபனமாகிறது: நல்ல கதைகள் எக்காலத்திலும் பொருந்தும் சமூகத்தின் கண்ணாடியாக விளங்குகின்றன. இக்கதையும் அப்படியே. நிஜாமுக்கு பதிலாக இன்றைய அரசை போட்டு படித்தால் மிகவும் பொருத்தமாய் தான் இருக்கிறது. ரஜாக்கர்களுக்கு பதிலாய் RSSன் சேவக்குகளைப் போட்டுப் பார்க்கலாம். சந்திரசேகரனின் விழிப்பு கதையின் கடைசி பத்தியில் நிகழ்கிறது. நமக்கும் அப்படித் தானோ, நம் வாழ்வின் முடிவில் மட்டுமே விழிப்போமோ???

எல்லோர்க்கும் பெய்யும் மழை

ஒரு மாத காலமாக தவமிருக்கிறோம் ஒரு சொட்டு மழைக்காக. எங்கள் மலையைத் தவிர மற்ற எல்லா இடங்களிலும் கொட்டி தீர்க்கிறது. நான் நினைத்துக் கொண்டிருந்தேன் நான் மிகவும் நல்லவன் என்று. நல்லோர் ஒருவர் உளரேல் அவர் பொருட்டு எல்லோர்க்கும் பெய்யும் மழை என்றது பொய்த்துப் போனதோ? இல்லை, காலத்திற்கு ஏற்ப விதிகளை கடவுள் மாற்றி விட்டாரோ?ஊர் ஊராய் சென்று மரம் வெட்டும் கூட்டம் உள்ள இந்த மலைக்கு இது தான் சரியான தீர்ப்பு என்று முடிவு செய்து விட்டாரோ?
அது எப்படி சரியாகும்? மனிதருடன் விலங்குகளும், பறவைகளும், தாவரங்களும், மரங்களும், புழு பூச்சிகளும் சேர்ந்து அல்லவா வாடி நிற்கின்றன? அவை செய்த குற்றம் என்ன?

அதள பாதாளத்திலிருந்தும் தண்ணீரை தோண்டி எடுத்து விடும் இந்த நாகரிக சமுதாயம் அதை கரும்பாக, கிழங்காக, வெளிநாடு செல்லும் வெள்ளரிக் காயாக , காசாக மாற்றி , அதை எண்ணி எண்ணிப் பார்த்து பரவசமடைகிறது; காசு கொடுத்து, குடிக்க தண்ணீர் வாங்கிக் கொள்கிறது. காசிருந்தால் எதையும் செய்யலாம் என்று வருங்கால சந்ததியையும் குட்டிசுவராக்கி முன்னேறி(!) சென்று கொண்டிருக்கிறது. அந்த கடவுளுக்கும் உண்டியலில் காசைப் போட்டு சரிக்கட்டி விடலாம் என்று நினைக்கிறது. ஆனால் கடவுளின் திட்டமோ வேறு மாதிரி போய்க் கொண்டிருக்கிறது – மொத்த மனித இனத்தையே ஒழித்துக் கட்டினால் தான் மற்ற உயிரினங்கள் வாழ முடியும் என்பது தெளிவாக தெரியும் ஒரு தீர்ப்பு. மழையினால் சிலரை, மழையே இல்லாமல் சிலரை என்று அழிக்கும் வேலை தொடங்கி விட்டது போல் தோன்றுகிறது.

இதில் collateral damage ஆக, என்னைப் போன்ற சிலரை ( நல்லவர்களை 🙂 ) காவு கொடுக்க அவர் தயங்குவாரா என்ன?

விடுதலை

வாட்ஸ் அப் என்னும் மாயச் சிறையில், சுயமாக ஆசைப்பட்டு, மாட்டிக் கிடந்தேன். காலை எழுந்தவுடன், கக்கூஸ் போகும்போது எடுத்த போனை, அதன் பிறகு கீழே வைப்பது என்பது, ஓரிரு நிமிடம் தான். சாப்பிடும்போது கையிலிருக்கும் ( இட்டிலி சாப்பிடுகிறேன் பாருங்கள்!!); பயணிக்கும் போது கையிலிருக்கும் ( red fort முன்னால் நின்று ஒரு selfie, வெளி நாடு சென்றாலோ அலட்டல் அடங்காது. . .); தும்மல் போட்டால், சளி பிடித்தால், உடனே பகிர்ந்துகொள்ள விரல்கள் துடிக்கும். மொத்தத்தில் சுய தம்பட்டம் அடிக்க ஒரு நல்ல தளம். ஆனால் சிக்கிக் கொண்டால் வெளியே வருவதற்கு பெரு முயற்சி தேவை.

தவிர, குழுக்கள் அமைத்து, தகவல் என்னும் பெயரில், குப்பையிலும் கேவலமான செய்திகளை forward செய்வது, கண்மண் தெரியாமல் விவாதம் என்ற பெயரில் நண்பர்களை இழிவு செய்வது, என்று பல சித்திரவதைகளை நடத்தி, அனுபவித்து நொந்து போன ஒரு நாள் காலை, கைபேசியிலிருந்து இந்த கொடும்பாவியை தூக்கி விட்டேன். ஓரிரு நாள் பித்து பிடித்தது போல இருந்தது. ஆனால் பிறகு தான் தெரிந்தது, பித்து விட்டது என்று!

இப்பொழுது எல்லாம் நிறைய படிக்க நேரம் இருக்கிறது. அசோக மித்திரனும், சுந்தர ராம்சாமியும், ஜெயமோகனும், புதுமைப்பித்தனும், லியோ டால்ஸ்டாயும், தோஸ்தயோவ்ஸ்கியும், தி. ஜானகிராமனும் ஆக்கிரமித்துக் கொண்டிருக்கிறார்கள். . .

நட்பும் உறவும் கொஞ்சம் பிரிந்தது போல தோன்றியது. சிந்தித்துப் பார்த்ததில், வாட்ஸ் அப் நெருக்கம் ஒரு செயற்கையான, மாயை நிறைந்த வெற்றிடம் என்பது உறுதிப்பட்டது.

என்னுடைய அலட்டல்களும் இன்னல்களும் இல்லாமல், நட்பும் உறவும் நிம்மதியாக வாட்ஸ் அப்பில் தொடர்வதாக கேள்வி!!

வாழ்க நம் உண்மை பந்தம்!

குடிமக்கள் உரிமை??

இன்று காலை நடைப்பயிற்சி முடித்து வரும் போது, எங்கள் வீடு செல்லும் மண் பாதையின் ஆரம்பத்தில், ஒரு கார் நின்று கொண்டிருந்தது. அதன் முன்னால் ஒரு பியர் பாட்டில் தரையில். நான்கு குடிமக்கள். நான் அவர்களிடம் அமைதியாக கேட்டுக் கொண்டேன், ” அய்யா, இங்கே குடிக்காதீர்கள்.” 

நான் வீட்டுக்கு போய் விட்டு திரும்பி வந்தேன், நிலைமையை பார்க்க. அவர்கள் இன்னமும் அதே இடத்தில். நான் என் கைபேசியை எடுத்து ஒரு போட்டோ எடுத்துக் கொண்டேன், ஆதாரத்திற்காக. குடிமக்களில் ஒருவர் எதுக்கு போட்டோ எடுக்கிற என்று சண்டைக்கு வந்தார். ஆரம்பித்தது யுத்தம். 

“சாலையில், அதுவும் காலையில் குடிக்கிறீர்களே, நியாயமா? இது என் வீட்டுக்கு போகும் சாலை. இங்கே குடிக்கக் கூடாது” என்றேன்.

“இது என்ன உங்க அப்பன் வீட்டு சொத்தா? நாங்கள் மலைவாழ் மக்கள். நீ வெளி ஊர்க்காரன். நாங்கள் எங்கு வேண்டுமானாலும் குடிப்போம், அதைக் கேற்க நீ யார்? உன்னுடைய நிலமே இல்லாமல் செய்து விடுவோம்” என்று வார்த்தை வளர்ந்தது.

பக்கத்தில் இருந்த தெரிந்தவர்கள் வந்தார்கள், நடு நிலையாக நின்று (!) பேசி அமைதிப் படுத்த முயன்றார்கள். சாலையில் குடிப்பது தவறு என்று ஒருவரும் எனக்கு ஆதரவு கொடுக்கவில்லை. நடு நிலை!!

ஒரு ஒழுக்கம் சம்பந்தப்பட்ட விடயத்தை உள்ளூர்க்காரன் வெளியூர்க்காரன் என்று திரித்து சண்டையை வளர்த்த இந்த குடிமக்களை என்ன செய்வது??

நெஞ்சு பொறுக்குதில்லையே. . .

சமீப காலமாக இணைய தள ஊடகங்களில் பரவி வரும், பரப்பப்பட்டு வரும் சில பொய்யான செய்திகளை படிக்கும் போது ஆத்திரம் பொங்குகிறது, அடி வயிறு கலங்குகிறது. அவற்றை அனுப்புபவர்களோ நெருங்கிய நண்பர்கள், நல்ல இதயம் படைத்தவர்கள். எப்படி இவ்வாறான தவறான கருத்துகளை பரப்புகிறார்கள் என்று புரியவில்லை.

ஒரு செய்தி வருகிறது. அது முதலில் உண்மையானதா என்று பார்ப்பதில்லை. அதன் அடிப்படை நோக்கம் என்ன என்பதைப் பார்ப்பதில்லை. பஜனை பாடுவது போல, அந்த செய்தியை அப்படியே அனுப்பி வைக்கிறார்கள். சிந்தனை சக்தி படைத்த எவரும் ஒரு கணமாவது யோசித்தால் புலப்படும் இதில் ஒளிந்திருக்கும் கபட நோக்கம்.

எனக்கு சில காலமாக நாட்டுப் பற்று என்று எவராவது சொன்னால் சிரிப்பு வருகிறது. கேனத்தனமாக இருக்கிறது இவர்களின் நாட்டுப் பற்று. அவர்கள் விதிக்கிறார்கள் இவையெல்லாம் நாட்டுப் பற்று, இவை தேசத் துரோகம் என்று. 

நடுத்தர இந்திய வர்க்கம் ஒட்டு மொத்தமாக ஒரு சுயநல கும்பலாக மாறி வரும் அவலத்தைப் பார்க்கிறேன். அவர்கள் தான் இந்த பொய்யான தேசப்பற்று என்ற வலையில் சிக்கி செய்யும் அக்கிரமங்களை நியாயப் படுத்துகிறார்கள். இதை யாராவது சுட்டிக் காட்டினால், அவரை துரோகி ஆக்கி கழுவில் ஏற்றி விடுவார்கள்.

படித்தும் பதறாய் போய்விட்ட இவர்களை நினைத்தால். . .

தமிழர் பண்பாடு

ஓரு சமுதாயம் முன்னேற, அதன் இளைஞர் கூட்டம் விழித்தெழ வேண்டும். தாய்த் தமிழ்நாடு விழித்துக் கொண்டது போலத் தெரிகிறது.

தமிழரின் வீர விளையாட்டாம் ஜல்லிக்கட்டை தடை செய்ததை எதிர்த்து இது வரை பல முயற்சிகள் செய்யப்பட்டு ஏதும் பலிக்கவில்லை. பொங்கல் சமயத்தில் கூக்குரல் இருக்கும், பிறகு மறக்கப்படும். பெரும்பாலும் இது ஒரு அரசியல் ஆட்டமாகவே இருந்தது. ஆனால் இம்முறை, பொறுத்தது போதும் பொங்கி எழுவோம் என்று ஆர்ப்பரித்து, இளைஞர் கூட்டம் ஒன்றுகூடி, அமைதியான ஆனால் பிரம்மாண்டமான போராட்டத்தில் குதித்துள்ளது. அருமை, அருமை. இனி நாடு உருப்பட்டுவிடும் என்று ஒரு நம்பிக்கை பிறக்கிறது. வாழ்த்துகிறோம்!

ஜல்லிக்கட்டுக்கு ஆதரவாக பலப் பல காரணங்கள் சொல்லப்படுகின்றன. ஆனால் இவற்றில் முதன்மையானதாகப் பேசப்படுவது தமிழர் பண்பாடு, தமிழ்க் கலாச்சாரம்“. தமிழினத்தில் ஒரு மிகச் சிறிய தொகையே பங்கேற்கும் ஜல்லிக்கட்டே மொத்த பண்பாட்டை பாதிக்கிறது என்றால், மொத்த தமிழினமே ஈடுபடும் சில செயல்கள் எந்த அளவு நம் பண்பாட்டை அழித்துக் கொண்டு வருகின்றன? இதோ ஒரு சிறிய பட்டியல்.

1. உயிரை விட மானமே பெரிதென்று தொட்டிலில் ஆடிய பருவத்திலிருந்து சொல்லி வளர்ந்தவர்கள் தமிழர்கள். அந்த மானம் இல்லாத ஒரு கூட்டம் தானே கடந்த நாற்பது ஆண்டுகளாக தமிழகத்தை தங்களுக்குள் பங்கு போட்டுக் கொண்டு சூரையாடி வருகிறது? எங்கே போனது தமிழ்ப் பண்பாடு? உலகத்திலேயே முதன்முதலாக மக்களாட்சி தோன்றிய இடங்களில் தமிழகமும் ஒன்று. குடவோலை, ஞாபகம் வருகிறதா? இப்பொழுது நடப்பது என்ன? ஆயிரம் ரூபாய் பிச்சைக் காசிற்கு அந்த உரிமையை விற்பவன் தானே தமிழன்?

2. நம் நாட்டு மாட்டினங்களை காப்பாற்றவே ஜல்லிக்கட்டு என்று ஒரு வாதம். மிகவும் சரியானதே. ஆனால் இது மட்டுமே காரணமா? தமிழனின் பேராசையும் தானே முக்கிய காரணம்? பொதுவாக நாட்டு மாடு 5 லிட்டர் கொடுக்கும். ஜெர்ஸி 20 லிட்டர் கொடுக்கும் என்று பேராசையில் தானே ஐயா நாட்டினங்களை கை விட்டோம்? இயற்கையான கருத்தரிப்பதை விட்டு ( காளை இருந்தாலும்) ஊசியைத் தானே நாடுகிறான் தமிழன்? ஏன்? எங்கே ஐயா, நமது பண்பாட்டுப் பற்று??

3. உறவினர்கள்,நண்பர்கள், அண்டை வீட்டார்கள், பக்கத்து ஊரார் என்று எல்லோரும் சேர்ந்து பேசிக் கலக்க உண்டானவை தான் தமிழர் திருவிழாக்கள் . இப்பொழுது?? காதை செவிடாக்கும் ஒலிபெருக்கிகள் இல்லாமல் ஏதாவது ஒரு கல்யாணம், கருமாதி, காதுகுத்து, கோயில் திருவிழா தமிழகத்தில் உண்டா? அதை விடுங்கள், இவை என்றோ ஒரு நாள் என்று சகித்துக் கொள்ளலாம். ஆனால், பேருந்துப் பயணம்? அந்த நாராசமான சத்தம் இல்லாவிட்டால் இளைஞர்கள் ஏற மாட்டார்கள் என்று தானே பேருந்துகள் இதைப் பொருத்துகிறார்கள்? இதுவா ஐயா நமது தமிழ் கலாசாரம்?

4. ஈவ் டீஸிங்: இதற்கு தமிழில் வார்த்தையே இல்லை. ஏன்? இப்படி ஒரு இழிவான செயல் நம் முன்னோர்க்கு தெரியாது.கேலி பேசுவார்கள்; கொச்சைப்படுத்தி இழிவுபடுத்தமாட்டார்கள். ஆனால் இப்போது? இது ஒரு அங்கீகரிக்கப்பட்ட, சாதாரணமான ஒரு நடத்தை ஆகி விட்டது. இதுவா நமது பண்பாடு?

5. செய்யும் தொழிலே தெய்வம் என்பது நமது பண்பாடு. ஆனால், எல்லோர்க்கும் உணவளிக்கும் உழவுத் தொழில் கேவலமாகி விட்டது. இளைய தமிழ் சமுதாயமே, கணிணியில் நெல் விளைவிக்க முடியாது. எத்தனை எத்தனை இளைஞர்கள் விவசாயத்தை கைவிட்டு பட்டணம் தேடி ஓடுகிறீர்கள்? இந்தச்செயல் எப்படி ஐயா நமது பண்பாட்டைக் காப்பாற்றும்?

இவற்றை எல்லாம் மாற்ற முடியும் என்று ஒரு நம்பிக்கையை இப்போது உருவாக்கி இருப்பதும் நீங்கள் தான் இளைஞர்களே! எந்த அரசியல் நோக்கமும், கட்சிகள் / அரசுகள் ஆதரவும் இல்லாமல் இப்படி ஒரு உன்னதமான போராட்டம் சாத்தியமே என்று நிரூபித்து காட்டியிருக்கிறீர்கள். தொடருங்கள் ஆக்கபூர்வமான உங்கள் பங்களிப்பை! மாறுவோம், மாற்றுவோம்!!

ஒளிமயமான எதிர்காலம் என் கண்ணில் தெரிகிறது. வாழ்த்துக்கள்!